სამზარეულოს დანების სხვადასხვა დანიშნულება

ნებისმიერ კულინარს, იქნება ის დამწყები თუ პროფესიონალი, სამზარეულოში საქმიანობისთვის შესაბამისი იარაღები სჭირდება. თუ დანების ნაკრებს არჩევთ, უნდა იცოდეთ, რომ არსებობს მათი სხვადასხვა ტიპი. პურის, ხორცისა და ბოსტნეულის საჭრელად დიდი ალბათობით ერთი და იგივე დანა არ გამოგადგებათ, თუმცა ისიც უნდა აღინიშნოს, რომ არსებობს მრავალფუნქციური ატრიბუტებიც. სამზარეულოს დანების ფართო არჩევანი შესაძლებლობას გაძლევთ ამოარჩიოთ თქვენს საჭიროებებზე მორგებული იარაღები. გადაწყვეტილების მიღებაში ჩვენი რეკომენდაციები დაგეხმარებათ. რა ტიპის დანებს ვხვდებით დანიშნულების მიხედვით? ამას სულ ცოტა ხანში გაიგებთ.

სამზარეულოს დანის ტიპები დანიშნულების მიხედვით

როგორც უკვე აღვნიშნეთ, დანიშნულების მიხედვით სამზარეულოს დანების სხვადასხვა ტიპი არსებობს. ისინი ერთმანეთისგან ზომით, მასალით, დანის პირის სიგრძით, ზედაპირითა და დიზაინით განსხვავდება. ზოგიერთ მათგანს ხერხისებური პირი აქვს და პურ-ფუნთუშეულის დასაჭრელად არის იდეალური, ზოგი პატარა ზომისაა და ბოსტნეულის გათლისთვის გამოიყენება, ზოგიც ხორცისა და თევზის დასამუშავებლად. მოდით, დაწვრილებით გავეცნოთ თითოეულ მათგანს და მათ ფუნქციებს.

შეფ-მზარეულის დანა

შეფ-მზარეულის დანები პროფესიონალი კულინარებისთვის არის განკუთვნილი. მათ, როგორც წესი, ფართო, ბასრი პირი აქვთ, რომლის სიგრძეც 20-დან 25 სმ-მდე მერყეობს. შეფ-მზარეულის დანა მრავალფუნქციურია და სხვადასხვა დანიშნულებით გამოიყენება. მისი საშუალებით თავისუფლად დაჭრით ბოსტნეულს, ხილს, ხორცს და მწვანილსაც კი. ამ ტიპის დანები განსაკუთრებით ბასრია. ისინი მოქნილად და სწრაფად მოძრაობაში ხელს არ გიშლით და სწორედ ამიტომ არის საკვების მომზადებისას მზარეულების განუყრელი ატრიბუტი. თუ კულინარიით სერიოზულად ხართ დაინტერესებული, მაშინ თქვნს ნაკრებში ეს იარაღი აუცილებლად უნდა მოიძებნებოდეს. 

დანები ხორცის დასამუშავებლად

ხორცის საჭრელი დანები რამდენიმე კატეგორიად იყოფა. შესაბამისად, განსხვავდება მათი დანიშნულება და გამოყენების წესიც. თუ ხორცის დამუშავება გსურთ, რაც რბილობის ძვლებისგან და კანისგან მოშორებას გულისხმობს, თხელი და მოქნილი პირის მქონე დანა გამოგადგებათ. უფრო სქელი და მყარი დანა კი ძვლების დასაჭრელად არის საუკეთესო ვარიანტი. იმის მიხედვით, თუ რა კერძს ამზადებთ, სხვადასხვა სახის იარაღები დაგჭირდებათ. 

პურ-ფუნთუშეულის საჭრელი დანა

პურ-ფუნთუშეულის საჭრელ დანებს გრძელი, დაკბილული პირი აქვთ, რომლის სიგრძეც დაახლოებით 20-25სმ-ია. დიზაინი სპეციალურად მსგავსი ნაწარმის დასაჭრელად არის გათვლილი, ისე, რომ მყარი ზედაპირი მარტივად ჩაჭრას და შიდა ტექსტურა არ დააზიანოს. 

ბოსტნეულისა და ხილის საფცქვნელი დანა

ზემოთ ჩამოთვლილი დანებისგან განსხვავებით, ბოსტნეულისა და ხილის საფცქვნელი დანა მცირე ზომისაა. ეს კომპაქტური იარაღი, რომლის სიგრძეც დაახლოებით 7.5-დან 10 სმ-მდეა, საუკეთესოა სურსათის წვრილად დასაჭრელად და დასაქუცმაცებლად. მისი ბასრი პირის დახმარებით სწრაფად შეძლებთ პროდუქტების მომზადებას. 

როგორ შევარჩიოთ სწორად სამზარეულოს დანა

სამზარეულოს დანის შერჩევისას პირველ რიგში თქვენი პირადი პრეფერენციები და მიზნები უნდა გაითვალისწინოთ. პროფესიონალები ხშირად გვირჩევენ, რომ ერთბაშად ყველა ტიპის დანის ყიდვას სჯობს, თავდაპირველად მრავალფუნქციური დანა შეიძინოთ, რომელიც სხვადასხვა საქმიანობაში გამოგადგებათ. გამოცდილების ზრდასთან ერთად, დანების ნაკრებს თანდათან შეავსებთ. ეს მიდგომა დაგეხმარებათ თავიდან აიცილოთ ზედმეტი ხარჯები და დროთა განმავლობაში ზუსტად გაიგოთ, რომელია თქვენთვის ყველაზე კომფორტული და საჭირო იარაღები.

როგორ მოვუაროთ სამზარეულოს დანებს

იმისთვის, რომ მრავალჯერადი გამოყენების შემდეგ თქვენი იარაღები არ დაბლაგვდეს, მათ სათანადო მოვლა სჭირდება. რეკომენდებულია დანების ხელით გარეცხვა თბილ წყალში, რადგან ჭურჭლის სარეცხი მანქანა ზოგჯერ დანის პირის დაზიანებას იწვევს. ასევე, გირჩევთ, პერიოდულად ინსტრუმენტები სალესად პროფესიონალთან მიიტანოთ. არსებობს ლესვის განსხვავებული ტექნიკები. გამოცდილი სპეციალისტი თქვენი საჭიროების მიხედვით შეარჩევს ყველაზე ოპტიმალურ მეთოდს. 

შეჯამება

სამზარეულოს დანების სწორად შერჩევა ნებისმიერი კულინარისთვის მნიშვნელოვანია. დანიშნულების მიხედვით, სხვადასხვა ტიპის იარაღებს ვხვდებით, როგორიცაა შეფ-მზარეულის, ხორცის, პურისა და ბოსტნეულის საფცქვნელი დანები. თითოეული მათგანი მნიშვნელოვან როლს ასრულებს საკვების მომზადების პროცესში. სწორი დანა სურსათის დამუშავებას საგრძნობლად ამარტივებს. მნიშვნელოვანია, რომ დანები პირადი საჭიროებების მიხედვით შეარჩიოთ და მათ სათანადოდ მოუაროთ, რათა წლების განმავლობაში თქვენი კულინარიული მისწრაფებების განხორციელებაში გაგიწიოთ კომპანიონობა.